上海闲话里的馒头和包子

　　有搿能一则笑话，一个人过安检，保安讲：“侬个双肩包拿下来过一过。”结果搿个人拿手浪向个生煎馒头递了过去……

　　假使保安搭乘客侪是老上海人，搿则笑话是勿存在个，“生煎”搭“双肩”勒上海闲话里向读音是勿同个，两个字也勿一样。或许呒没“介”勿一样，但足够分辨，勿会弄错脱个。

　　而生煎包，上海人一般勿是搿能讲个，侪叫伊生煎馒头。凡是面粉发酵蒸熟之后吃个，上海人侪叫馒头个。生煎，叫生煎馒头。小笼，叫小笼馒头。肉芯子个叫肉馒头，菜芯子个叫菜馒头，豆沙个就叫豆沙馒头，葛末，呒没芯子个呢？搿叫淡馒头，或白馒头，或者叫伊高庄馒头，大概是因为上海有勿少山东人个原因伐。高庄其实只是临沂底下头个一只镇，为啥“高庄馒头”个名号可以风靡上海？有老法师晓得个，欢迎来指点一二。

　　生煎馒头、小笼馒头对于我迭个土生土长个上海小囡来讲，两样物事侪是熊掌，一样也舍勿得惯脱个。

　　上海个生煎是一种最大众个点心，褶皱向上，花枝招展，皮厚，底脆，鲜甜，芯子完整紧实，咬开来一包个汤。

　　再讲小笼，梁实秋曾经写到：“上海沈大成、北万馨（此“馨”是勿是那“新”，已经问勿到梁先生了）、五芳斋所供应个早点汤包，是让人勿会忘记个一种。包子小，小到只好一口一只，但是每一只侪包得玲珑精致……嗲就嗲勒包子皮，半发半勿发，薄厚适中，制作工艺邪气有技巧。”

　　搿是梁实秋心目中个上海汤包，也是我心里个小笼馒头。

　　言归正传。馒头个名字，词源是“蛮头”。《三国演义》里向诸葛亮七擒孟获，有一仗用火攻对付蛮人个藤甲兵，烧得实在忒惨。班师回朝渡泸水个辰光，河水翻腾无法通过。孔明是啥个人啊，马上想到自家杀戮忒多，造了孽了，勿搞点“封建迷信活动”恐怕过勿了搿一关。按照当地个习俗，是要用人头来祭祀个，诸葛亮当然勿会得搿能介做个，伊就让手下头人用面粉捏了人头个形状来代替。从此，“蛮头”就进入了中国人个食谱，“蛮头”变成功了“馒头”，一吃就是千把年了。

　　葛末问题来了，馒头搭包子究竟是啥个关系呢？

　　关于诸葛亮创造馒头个历史，其实并勿是正史，《三国演义》也是道听途说个。伊是从啥地方听得来个呢？宋朝高承写个本《事物纪原》。从书名就可以晓得，相当于当时个百科全书，里向搿能记载：“诸葛亮南征，取面画人头祭之”。

　　“馒头”之名起源勿晚于宋朝。而“包子”搭“馒头”相比，历史也同样悠久。南宋吴自牧有本讲述临安繁华个《梦粱录》，其中写到：“酒店内专卖灌浆馒头、薄皮春茧包子、虾肉包子……”可见，勒南宋，馒头搭包子已经并行了。

　　到清朝，馒头搭包子开始分流，《清稗类钞》里向讲，勒北方，有馅子个叫包子，呒没馅子个叫馒头。而勒南方，有馅子呒没馅子侪叫馒头。搿种差别，从清朝、民国一直延续到今朝。

　　改革开放以后，南北方个交流越来越频繁，上海闲话受普通闲话影响，尤其90年以后出生个上海人，大多数讲勿来标准个上海闲话，勒搿能个背景下，“生煎包”“双肩包”搿种以前认为勿可能个笑话，勒生活当中就常庄出现了。而遍布上海马路浪个“包子”铺，自然勿会再拿包子叫“馒头”。从清朝延续至今个“馒头”搭“包子”个南北之分，就有了消失个危险。

　　因为“馒头”搿个“口头非遗”有消失个危险，勿少上海人有了执念，认为勒强力推广普通话之前，上海人只讲“馒头”，勿讲“包子”。只要听到有上海人讲“包子”，就要拿“馒头”出来讲一遍。

　　葛末，上海人从来勿讲包子个？勿一定个噢。

　　要晓得，上海迭座城市是海纳百川个，勿是从上个世纪90年代开始个，而是有得一百六十多年了。小笼包，当然是叫“小笼馒头”个，但是上海个苏州汤包，好像一直侪是叫汤“包”，从来呒没叫过“汤馒头”。还有，扬州餐馆里个三丁包、五丁包，也勿叫三丁馒头、五丁馒头。

　　汤包搭三丁包、五丁包算上海小吃伐？应该算个伐。长宁个朋友侪记得当年天山饭店个“天山大包”，也有点年头了，并呒没叫“天山大馒头”。

　　1982年9月南市区饮食公司编写个《上海老城隍庙特色菜点》油印本，其中收录了老饭店、绿波廊、无锡饭店、南翔馒头店、松盛、湖滨等多家老字号个点心配方。看看目录，南翔馒头店收录“南翔馒头”呒没小笼两个字，而素菜馆收录个点心当中，清清爽爽有“素菜包”“素蟹粉包”“素肉包”搭仔“豆沙包”。按照比较固执个老上海个讲法，搿眼“包”难道勿应该侪叫“馒头”？

　　语言是勒勿断发展个，上海闲话也一样。老上海一般拿包子叫馒头，勿应该忘记伊勿是“绝对”。

　　上海闲话是汉语个一个部分，必然受到各种其他方言个影响。近十几年来，“包子”显然是占上风了，但我相信，有地介许多“馒头党”勒海，“馒头”迭个词也绝对勿会消失个。

作者：周力